وفي البدء كانت الميدان!

Posted on ديسمبر 21, 2011

1


“زيارتي” إلى سوق أبو حبل البارحة كانت غير كل الزيارات، ما شفت بحياتي هي الكمية من لأمن وصدقني أنا شفت كتير، حصار جامع الدقاق من كل الجهات كان السبب بأني ضليت أمشي أكتر من ساعة لأتعرف على أماكن وجود الأمن، لأني ما بعرف حدا، ورحت لهونيك عالعمياني، بدون أي مساعدة. كان أغلب الناس عيوني، بيشوف وبيخبرك من تحت لتحت: (هي الحارة مسكرة روح من عاليسار) أو(الأمن أكتر من البشر يا أخي لا تروح هنيك بنوب. هويتك ميدان؟ إي لا تروح بنوب إذا هويتك مو ميدان).. إي.. إن شاء الله خير، ضلّيت افتل لح ما اكتشفت أنو في مكانين فقط لتطلع من الميدان قبل ما تتسكر، وكان واضح أنو الأمن بدو يحاصر أي مظاهرة بغرض الاعتقال وليس التفريق.. يعني بدهن يدعسونا! إي.. إن شاء الله خير.. ضليت عم امشي.. الفرجة على الناس بالشارع كنز، اللي بيمشي كتير بيقدر يميّز من النظرة الأولى أكثر. فيك تشوف التعاطف، وبتخاف لأنو كل الناس بتعرف أنو هذا الأهبل اللي ماشي بالشارع (حضرتي) نازل عالمظاهرة..
بحدود الساعة 2 ونص، سمعت هدير جاية من جهة ما، ركضت أنا وكل الشباب اللي ماشيين معي بنفس المكان (صدفة؟) وكلنا طلعنا متظاهرين، قبل لحظة من الدخول بالمظاهرة رجع الخوف مسكني، استحكمني، واتمنى تكون هي المرة الأخيرة. حاولت أقتل الخوف اللي ما كان صايبني بالمظاهرات اللي رحتلها قبل، يعني أنا تعرضت لإطلاق نار بحمص وشفت الجرحى والشهداء. بس التظاهر بالميدان البارحة كان عمل بطولي، ومو من طرفي أكيد، أنا فقط شخص سمع الصوت ولحقه، البطولة أنك تبدأ المظاهرة وتنظّمها (تنسيقية الميدان)، تطمّن الآخرين بأنّك تبخّ على الحيط والأرض (صبايا القابون الحرة)، تحمي الصبايا لمّا هجم الأمن (أهالي الميدان).

عشر دقائق كانت كافية لأرجع أغرم بالشام، عاصمة الثورة المدنيةـ من كل الطوائف والاتجاهات السياسية، الثورة الجامعة ممثّلة بأفضل طريقة في الشام، وواجبنا الحفاظ على كل فرد فيها، كل نفس وكل صوت وكل بخّة حرية بالشام هي خطوة على الطريق.. قبل ما انزل قلت أنو الشام هي الفرصة الأخيرة للسلمية  وبسحب كلامي، سوريا كلها في الشام، وكلنا مع بعض فينا نوقف بوجه هالزعران.. بعد دقائق في المظاهرة ظهر أنو كلنا إيد وحدة، قلب واحد، رغماً عن النظام، وعن المعارضات والطائفية والمشككين، وقبل كل شيء.. رغماً عن الصامتين.

هذا الفيديو القصير جدّاً الذي صورته في المظاهرة http://youtu.be/qiQPOsInoN8

Advertisements
Posted in: مخربشات